Yr Ymgeisydd
This post is also available in: English
Yr ymgeisydd - Guto Bebb
Ymladdodd Guto ei etholiad cyntaf ar ran y Ceidwadwyr Cymreig fel ymgeisydd seneddol yn is-etholiad Ogwr. Yn dilyn y bedydd tan hwn cafodd ei ddewis fel ymgeisydd ar gyfer etholaeth Conwy yn etholiadau’r Cynulliad yn 2003. Yn dilyn ymgyrch gadarn bu i Guto gyfrannu at gynyddu pleidlais y Ceidwadwyr o 18% i 25% gan ddod o fewn 5% i’r ymgeisydd Llafur buddugol. Er mwyn adeiladu ar y llwyddiant hwn cafodd Guto ei ddewis yn Ymgeisydd Seneddol ar gyfer Etholiad Cyffredinol 2005. Bu’r ymgyrch yn llwyddiant gyda’r canlyniad yn dangos gogwydd o 5% i’r Blaid Geidwadol yng Nghonwy o gymharu â llai na 1% trwy Gymru. Yn dilyn ei lwyddiant wrth gael ei gynnwys fel un o’r ‘A list’ dethol o ymgeiswyr Ceidwadol cafodd Guto ei fabwysiadu yn unfrydol fel ymgeisydd seneddol y Blaid Geidwadol yn Aberconwy ym mis Medi 2007.
Diddordeb arall cyson sydd gan Guto yn y byd gwleidyddol yw materion Ewropeaidd. Yn aelod o Gyngor Cymru o ‘Business for Sterling’ bu Guto’n llefarydd amlwg dros y grŵp pwysa hwn yn ystod y cyfnod rhwng 2000 a 2003. Fel y daeth hi’n amlwg na fyddai Prydain yn mabwysiadu’r arian sengl Ewropeaidd bu i Guto ymuno gyda ‘Open Europe’ sef y corf fu’n gyfrifol am yr ymgyrch ‘I want a Referendum’. Penllanw'r gwaith yma oedd dewis etholaeth Aberconwy ar gyfer pleidlais bost ar fater cytundeb Lisbon. Bu i’r ymgyrch ddenu 37% i bleidleisio gyda 90% o’r rhai hyn yn gofyn am yr hawl i ddatgan barn ar y cytundeb.
Cafodd Guto ei eni a’i fagu yng Ngogledd Cymru ac y mae’n un o raddedigion Prifysgol Cymru, Aberystwyth. Yn 1993 bu iddo sefydlu Partneriaeth Egin, sef ymgynghoriaeth ddatblygu economaidd, sydd wedi masnachu’n gyson ers un mlynedd ar bymtheg bellach. Bu i Guto hefyd sefydlu a rheoli siop lyfrau mewn partneriaeth gyda’i wraig cyn gwerthu’r fenter yn 2002. Y mae Guto hefyd yn Gyfarwyddwr Datblygu Busnes Innovas Cymru ac y mae wedi gweithio ar brosiectau sylweddol iawn gyda’r cwmni hwn dros y tair blynedd ddiwethaf. Trwy ei waith a hefyd ei ymgyrchu gwleidyddol cyson y mae Guto wedi datblygu dealltwriaeth gadarn o anghenion economi wledig ynghyd â’r her sy’n wynebu busnesau bychain yng Nghymru.
Yn briod ag Esyllt ers un mlynedd ar bymtheg y mae ganddynt bump o blant - ganwyd yr efeilliaid yn ystod ymgyrch Etholiad Cyffredinol 2005! Yn unigolyn addysgedig a brwdfrydig y mae Guto’n uchel ei barch fel cyfrannwr cyson a chytbwys ar faterion Cymreig a Phrydeinig. Y mae’n credu’n gryf mewn ymgynghori gyda’r cyhoedd ac yn gryf o’r farn fod angen tegwch mewn bywyd cyhoeddus. Yn allweddol y dyddiau hyn y mae’n cynnig profiad helaeth o’r byd go iawn yn wahanol i'r nifer cynyddol o wleidyddion sydd erioed wedi gwneud unrhyw waith arall.
Y mae ganddo ddiddordeb yn eich syniadau a’ch barn felly ymunwch yn y drafodaeth!
Croeso i Wefan Newydd Ceidwadwyr Aberconwy
Fy enw yw Guto Bebb ac dwi'n gobeithio cael y fraint o'ch cynrychioli fel eich Aelod Seneddol. yr wyf yn llawn werthfawrogi nad mater o weithio am bedair wythnos cyn etholiad yw bod yn Ymgeisydd Seneddol. I wneud y gwaith yn iawn mae angen gweithio’n galed a chyson ac fe ddylai’r safle hwn gynnig cyflwyniad i’r gwaith yr wyf yn ei wneud o wythnos i wythnos ynghyd â thrafodaeth o faterion y dydd.
Mae gwleidyddion yn destun gwawd ar hyn o bryd a hawdd deall pam. Y mae ganddom lywodraeth wan a blinedig ynghyd â Senedd sy’n cynnwys gormod o unigolion sydd wedi gweithredu’n farus ac anheilwng o ffydd yr etholwyr. Er gwaethaf hyn yr wyf yn dal i gredu y gall gwleidyddiaeth wneud gwahaniaeth. Yr wyf wedi bod yn hunangyflogedig ers yn 23 oed ac yr wyf yn llawn werthfawrogi pa mor galed sy’n rhaid gweithio er mwyn talu’r biliau, cynnal teulu a chynllunio am y dyfodol. Byddai’r cefndir hwn yn fodd o sicrhau y byddwn bob amser yn ystyriol a gofalus o ddefnydd y llywodraeth o arian cyhoeddus.
Fel y bu i mi ddweud, fe all gwleidyddiaeth fod yn berthnasol ac mae’r canlynol yn esiamplau o faterion sydd angen sylw llywodraeth egniol newydd;
1. Bydd y DU yn benthyca £175biliwn y flwyddyn yma’n unig. Y mae hyn yn fwy na’r holl dreth incwm a gesglir mewn blwyddyn. Yn 2010/11 yr ydym yn debygol o orfod benthyca hyd yn oed mwy. A oes hawl ganddom i greu’r fath ddyled gan ddisgwyl i’n plant a phlant ein plant dalu’r pris ar ein rhan?
2. Y mae gwario ar y Gwasanaeth Iechyd wedi cynyddu 300% ers 1997. Y mae pethau wedi gwella – yr wyf yn gwerthfawrogi hyn ac mae fy nheulu wedi elwa o wasanaeth Ysbyty Gwynedd ac Alder Hay. Ond a yw pethau dair gwaith yn well na’r sefyllfa yn 1997? Oes angen byddin o weinyddwyr yn derbyn cyflogau o £50mil,£100mil a hyd yn oed mwy? Y mae’r Gwasanaeth Iechyd wedi gwella ond mae yna hefyd wastraff sylweddol o fewn y drefn fel y mae’n bodoli sydd angen sylw.
3. Beth am ein trefniadau pensiwn? Yn 1997 yr oedd gan Brydain fwy o gynilion pensiwn na unrhyw wlad arall yn Ewrop. Y mae’r cynilion hyn wedi eu trethu gan Lafur gyda mwy na £100billion wedi’i golli ers 1997. Bellach mae ganddom ddau fath o weithwyr. Y rhai hynny yn y Sector Gyhoeddus lle mae pob trethdalwr yn talu am eu trefniadau pensiwn hael ac yna’r mwyafrif llethol yn y Sector Breifat sy’n mynd i dderbyn pensiwn y wladwriaeth o £90 yr wythnos gan ychwanegu rhyw £40 ar gyfartaledd oherwydd eu cynilion. A yw hyn yn deg?
4. Y mae angen rhoi Gogledd Cymru yn ôl ar y map. Y mae Caerdydd yn anghofio amdanom yn rhy hawdd. Y mae’n rhaid i’r Cynulliad weithio dros bawb nid Caerdydd a’r de ddwyrain yn unig.
Rhai manylion personol:
Bu i mi sefyll yn etholaeth Conwy ar ran y Ceidwadwyr yn 2005 pryd y llwyddais, gyda’ch cefnogaeth, i leihau'r mwyafrif Llafur yn sylweddol. Bellach mae gan Lafur fwyafrif o lai na 500 drosof yn yr etholaeth hon.
Yr wyf yn briod ag Esyllt ers un mlynedd ar bymtheg ac mae ganddom bump o blant. Cefais fy ngeni a fy magu yng Ngogledd Cymru gyda fy rhieni yn hanu o Fangor. Yr wyf wedi gweithio yn yr ardal hon ar hyd fy oes. Pan ddaw’r etholiad fe fyddwn yn gwerthfawrogi eich cefnogaeth.
Rhowch bwerau cynllunio nôl i Gymunedau
Wrth gymryd rhan mewn dadl ar Bolisi Cynllunio yn y Cynulliad heddiw, dywedodd Cyng. Janet Finch-Saunders AC:
“Mae angen i ni hyrwyddo canllawiau cynllunio mwy llym er mwyn rhwystro adeiladu ar safleoedd bregus amgylcheddol er enghraifft safleoedd tir glas a gorlifdiroedd.
“Mi fyddai hyn yn rhwystro datblygiadau anghynaladwy sy’n niweidio’r economi.
“’Rwyf hefyd yn galw am ail-ddifiniad o safleoedd tir llwyd i eithrio gerddi er mwyn leihau’r duedd gynyddol o ‘grafangio-gerddi’ gan ddatblygwyr.
“Grymuso cymunedau yw beth ddylai diwygiad rheolau cynllunio fod amdano, a ‘rwyf yn edrych ymlaen at gynnydd yng Nghymru mewn perthynas i ganllawiau cynllunio.”